मी कोण होणार ...?

 

 लेखिका : सौ. तृप्ती पाडळकर

     आज, मला नवीन ठिकाणी आणले आहे, येथे फुलांची सुंदर सजावट केली आहे, दिव्यांची रोषणाई, रंगीबेरंगी फुगे लावलेले आहेत, खूप छान वाटत आहे. देवा, भिंतीवर पण काहीतरी लिहिलेले दिसतंय, पण झाकलेले आहे, का बरं ? मला कळत नाही. 

      बापरे! किती ही माणसे! हॉस्पिटल नंतर, आजच मी इतकी माणसे बघत आहे. आजोबा हसत कुणाबरोबर  बोलत आहेत, बहुतेक ते त्यांचे मित्र असावेत. आजी पण सारखे माझा सोनू, माझा सोनू म्हणून ह्या लोकांना सांगत आहे, कदाचित ते तिचे नातलग  असावेत. आई - बाबा  तर लोकांच्या गराड्यातच आहेत, मित्र-मैत्रिणी काय, नातेवाईक काय, नुसती धमाल. काका जरा कामात दिसतोय, नाहीतर मला बघताक्षणीच शिटी मारतो, काय सांगू देवाss काकाची शिटी म्हणजे जणू काही कोकिळेची कुंजनच.   

      कुणीतरी कुजबुजतोय शाळा, शाळा. अडीच वर्षाचा झाला की, Play group सुरु होईल, मग कुठले बोर्ड ? State, CBSE, ICSE, का International? एक काकी म्हणाली, "माझा बाळ State Board ला आहे", दुसरे एक  काका म्हणाले, "माझी छकुली CBSE ला आहे". देवाss शाळा म्हणजे मुलांनी जायचे ठिकाण, हे मला आज समजले, म्हणजे माझी पण रवानगी शाळेत होणारचं, नाही का! हे आजोबा काय बरं म्हणत आहेत? बाबा सारखा 'Engineer' होणार का आई सारखा 'CA'. बापरे! किती मोठे शब्द! काका सारखा 'Doctor' तरी होशील का? Doctor मला माहीत देवा, कारण त्यांच्याच मदतीने मी आईच्या गर्भातून बाहेर आलो. शाळेनंतर पण पुढे शिकावं लागते, असं वाटतंय. मला खूप बुध्दी दे, please.   

     मला ह्या हातातून - त्या हातात, इकडून -तिकडे सारखे फिरवत आहेत, आवळणे-चिवळणे चालूच आहे, पुरता दमून गेलो मी बुवा. तेवढ्यात एका छोट्या दादाने मला उचलून घेतले, त्याच्या हाताचा स्पर्श किती कोमल आहे, अरेच्या, हा तर मुलांचा घोळका आहे, माझेच दादा आणि ताई आहेत ना ते! त्यांच्या स्पर्शात मला प्रेम, माया, काळजी यांची जाणीव झाली. कुणी माझ्या गालांचा पापा घेतंय, तर कुणी माझा हात आपल्या हातात घेऊन कुरवाळतोय, माझ्याबरोबर फोटो काढण्यासाठी तर चढाओढच लागली आहे, मलाही खूप मज्जा येत आहे, तू पण माझ्याबरोबर असता तर.....

      बाबा वर्गात 'topper ' होता, तू पण तसाच हुशार होणार का? असे कुणीतरी कुत्सितपणे विचारीत आहे कारण त्यांच्या हाताचा स्पर्श मला प्रेमाचा वाटत नव्हता, आपुलकीचा वाटत नव्हता. कुणी प्रेमाने माझ्याकडे बघत आहे, तर कुणी ईर्षेच्या भावनेने बघत आहे, बघू ,बघू मोठा झाल्यावर काय दिवे लावतो ते! असे भाव काहींच्या डोळ्यात दिसत आहेत. मला भिती वाटू लागली आहे देवा ..  या जगात प्रेम करणारी तसेच निंदा करणारीही माणसे आहेत तर! तू सदैव माझ्याबरोबर रहा, म्हणजे मी निर्भय राहीन, निश्चिन्त राहीन. तुझ्याकडे कसे सगळं छानच छान, राग नाही, निंदा नाही फक्त प्रेम आणि प्रेमच .     

    एवढ्यात आईने मला जवळ घेतलं,गालावरून हात फिरवला, बरं वाटलं, अगदी सुरक्षित हातात आलो. मला सजवलेल्या पाळण्यात ठेवलं,आत्याने कानांत कुर्रर्र केलं, तसं झाकलेले नाव सर्वांसमोर आले 'सार्थक' म्हणजे आजपासून मला या नावाने ओळखणार तर! आत्याने माझ्यासाठी "लिंबोणीच्या झाडामागे" हे गाणे गायले, किती  गोड आवाज आहे तिचा! ऐकतच रहावं असं वाटत होतं. लोकांनी भेटवस्तूंचा अक्षरशः पाऊस पाडला, पण खरं सांगू का देवा! तुझा आशीर्वादच मला best वाटला. जेवणाला सुरवात झाली, आई-बाबा सर्वांना आवर्जून विचारत आहेत, सर्वांनी जेवणाचा आस्वाद घेतला. आजी-आजोबांनी सर्वांना हसून निरोप दिला.

     हॉल शांत झाला, आईने मांडीवर घेतले, आजीने हातात काहीतरी घेतले व म्हणाली, "माझ्या सोनूची दृष्ट काढते" ,काहीतरी पुटपुटत होती, मला मजाच वाटली. आजी म्हणाली, "माझ्या सोन्या, करिअर बनवायला देवाचा आशीर्वाद आणि आई-बाबांचे प्रयत्न असणारच आहेत, पण सर्वप्रथम तू एक चांगली व्यक्ती हो, कर्तृत्ववान व्यक्ती होण्याअगोदर सुसंस्कृत व्यक्ती होणे हे महत्वाचे आहे,असे बोलून तिने डोळे भरून माझा गोड पापा घेतला, अगदी देवा तुझ्यासारखा .

     आता मला झोप येत आहे, बरं तर मी  झोपतो, उद्या भेटूया, good night, देवा.        

Click here to go back to themarathistory.com