मी मोठा की छोटा .... ? 🤔

 

लेखिका : सौ. तृप्ती पाडळकर

     अरे निहार, ऐक जरा ssss मला काही सांगू नको आई, मी आता पहिलीत गेलोय, मी मोठा झालोय, निहार बोलत होता. आजी-आजोबा खो खो हसू लागले. पण तुला बाबांसारखी दाढी, मिशी कुठे आलीय? आजीने विचारले. नाही, तेवढा मोठा झालो नाही, पण थोडा मोठा झालो आहे, असे बोलून त्याने बाहेर खेळायला धूम ठोकली. मला भीती वाटते, नयना बोलू लागली, निहार छोटा असताना घरातील चार गोष्टी ऐकायचा व  बाहेरील गोष्टींकडे दुर्लक्ष करायचा, आता नेमकं त्याचं उलट झालंय, बाहेरचं जास्त ऐकतोय व घरातील गोष्टींकडे दुर्लक्ष करतोय. काही काळजी करू नकोस, देवाची प्रार्थना आणि आपले संस्कार त्याला वाईट मार्गावर जाऊ देणार नाहीत, तू फक्त लक्ष ठेव, नयनाला सासू-सासरे समजाऊ लागले.

     उद्या सुट्टी, शाळेला बुट्टी म्हणत, तो आई-बाबांच्यामध्ये येऊन झोपला. निहार, अरे निहार, चल माझ्याबरोबर, त्याला वाटले राजू खेळायला बोलवायला आला, तो डोळे चोळून बघू लागला, पण राजू काही दिसेना. 'चल माझ्याबरोबर' एवढेच शब्द त्याच्या कानावर पडले, तो  मुकाट्याने चालू लागला. एव्हाना त्याची झोप पुरती उडाली होती, आपण कुठेतरी चाललोय याची त्याला जाणीव होऊ लागली, तो चक्क इंद्राच्या दरबारात पोहचला होता. इंद्राने विचारले, "तुझ्या बाजूला कोण उभे आहे?" तो हसत म्हणाला, "नारदमुनी". अरे वा! तुला माहीत आहे तर, हुशार आहेस, इंद्राने त्याचे कौतुक केले. देवा, मी रोज आजी-आजोबांबरोबर टिव्हीवर देवाची Serial बघतो, त्यात असेच नारदमुनी आहेत, मस्तकावर फुलांची माळ आणि हातात वीणा नारायण, नारायण. सर्व देव हसू लागले.    

           निहार, तू आईला म्हणतो ना, मी मोठा झालो, मला काही सांगू नको, इंद्रदेव बोलले. अरे बापरे! देवा तू  देव्हाऱ्यात बसून सारं ऐकले का? मी देवाला विचारले. इंद्रदेव स्मितहास्य करत म्हणाले, "आता मी तुझी परिक्षा घेणार, तुला पाच प्रश्न विचारणार, मग ठरवू, तू छोटा आहेस की मोठा". 

खरंतर मी खूपच घाबरलो होतो, पण उसनं अवसान आणून म्हणालो, " देवा, मी तयार आहे" .

   पहिला  प्रश्न  इंद्राने विचारला : तुझ्या  आईला  काय  आवडते ?

  मी  उत्तर दिले : साडी, दागिने, ड्रेस, मेकअप किट.

   इंद्र म्हणाला : चूक. तिला  सर्वात जास्त  तू आवडतोस.

   दुसरा प्रश्न रंभेने  विचारला : तुझ्या बाबांना  खायला काय आवडते?

  माझे  उत्तर : वडापाव, समोसा, पाव-भाजी आणि  पिझ्झा.

 रंभा  म्हणाली : चूक. जे तुला आवडते तेच त्यांना आवडते.

 तिसरा प्रश्न देवीने विचारला : तुझ्या आजोबांना सर्वात जास्त कोणाचा आवाज आवडतो?

 माझे उत्तर : सुरेश वाडकर, लता दीदी, आशा भोसले. 

 देवी म्हणाली : चूक. तुझा गोड आवाज त्यांना सर्वात जास्त आवडतो. तू 'नाच रे मोरा' गाणं म्हणतो, तेव्हा ते किती छान मान डोलवतात.

  चौथा प्रश्न मेनकेने विचारला : तुझ्या आजीला केव्हा आनंद होतो?

   "एकदम सोपे उत्तर आहे", मी म्हणालो. जेव्हा आजोबा तिच्या आवडीचे ice-cream आणतात तेव्हा ती खूप खुश होते.

  मेनका म्हणाली : चूक. जेव्हा तू तिच्या गळ्याला मिठी मारतो आणि तिचा गालाचा पापा घेतोस, तेव्हा तिला सगळ्यात जास्त आनंद होतो.  

   आता शेवटचा प्रश्न : तुला सगळ्यात जास्त काय खायला आवडते?

  देवा, ह्या प्रश्नाचे उत्तर आईलाच माहित आहे, ती रोज डब्यात छान, छान खाऊ देते आणि मी आवडीने खातो.

  तशी इंद्राने खिशातून मोठी list बाहेर काढली. बापरे, एवढे सारे पदार्थ आई माझ्यासाठी बनवते, देवा मी थक्कच झालो.

 "ही  list तुझ्या आईला पाठ असते" , इंद्रदेव हसत म्हणाले.

 नंतर मला एक certificate देण्यात आले. "मी छोटा आहे, असेच लिहिले आहे ना! देवा, तू तर राईटच आहे" मी इंद्रदेवाला म्हणालो. पण एक गोष्ट तू लक्षात ठेव, आपल्यातील ही गंमत तू कुणालाच सांगायची नाही, इंद्रदेव मला म्हणाले.

  देवा, कसं सांगू? तू घेतलेल्या परीक्षेत मी fail झालो, पण मी आता घरी कसा जाऊ? मी रडक्या सुरात म्हणालो. देवाने नारदांना खूण केली. "आत्ता सोडतो देवा", नारद म्हणाले.  

   निहार, अरे माझं बोट का बरं पकडून ठेवलंस? सकाळ झाली, मला उठायचे आहे, नयना बोलत होती. "आई, माझ्या हातात certificate आहे", निहार म्हणाला. कसले certificate नयना त्याला विचारू लागली. तसे मी खाडकन डोळे उघडले, लक्षात आले की,  देवाची गंमत सांगायची नाही कुणाला! 

     आईच्या गालावर हात फिरवत तिला म्हणालो, "आई , मी तुझा बाबू अजून छोटाच आहे, तुझे सगळे ऐकीन हं!